Հայաստանի ամենաաշխույժ, ամենակոլորիտային ու արևոտ քաղաքի սրտում, հնի ու նորի խաչմերուկում կա մի գողտրիկ անկյուն, որը հյուրերին սպասարկում է՝ օգտագործելով արևի ուժը։ Քաղաքի հյուրերին «Վիլլա Կարս» հյուրանոցը գրավում է ոչ միայն իր ճարտարապետությամբ ու դիզայնով, այլև կանաչ ապագայի հանդեպ հավատարմության մասին վկայությամբ՝ Shtigen-ի տեղադրած արևային կայանով:
Նախագիծ, որի արդյունքում «Վիլլա Կարսն» անցում է կատարել արևային էներգետիկայի՝ լիարժեք պահպանելով պատմամշակութային կառույցի տեսքը
16 Հունիսի, 2023
Կումայրի արգելոցի ճանապարհին գտնվող այս հյուրանոցում կայան տեղադրելը Shtigen-ի համար տարբեր առումներով էր մարտահրավերային։ Խնդիր էր դրված այնպես տեղադրել վահանակները, որ պատմամշակութային կառույցի տեսքը չխաթարվի։
Կայանի տեղադրման աշխատանքները համակարգող Shtigen-ի աշխատակցի՝ Հովհաննես Գրիգորյանի համար առանձնակի կարևորություն ուներ այս նախագիծը, քանի որ աշխատանքը կատարվելու էր հենց այն փողոցում, որտեղ անցել էր նրա մանկությունը։
Տեղադրման համար բարդ, աստիճանաձև տանիքներից ընտրվեցին ամենահուսալիները, և կայանը կառուցվեց փոքր անկյան տակ, մի քանի տանիքների վրա։ Արդյունքում՝ կառույցի պատմամշակութային տեսքը լիովին պահպանվեց, կայանի արտադրողականությունն էլ առանձնապես չտուժեց։
15 Կվտ հզորությամբ կայանը տարեկան արտադրելու է մոտ 22 հզր կՎտժ էլեկտրաէներգիա, իսկ խնայողությունը կկազմի ավելի քան 1 մլն դրամ։
